Patrick Vaillantek 1990eko hamarkadaren hasieran ezagutu zuen Kepa Junkera, Riccardo Tesi duoko kidearen bitartez, eta txundituta geratu zen zuzeneko diskoan “Huriondo” buruz buru grabatu ondoren. Hala ere, mandolina laukote baten ideia ez da berea, taldeko beste mandolina jotzaile batena baizik; hots, Thomas Biénabe-rena. «Melonious Quarteten proiektua 1990eko hamarkadan heldu zen, Modern Mandolin Quartet estatubatuarrek inspiratuta», Patricken arabera. Asmoa zen mandolinatik abiatuta instrumentu berriak sortzea, eta hori André Sakellaridès Marseillako luthierrari esker lortu zen. «Hark ireki zigun bide hori, eta, guk eskatuta, laukote original eta berezi bat diseinatu zuen... gitarrarik gabe!». 2009an proposatu zion Kepak Patricki indarrak batzea, trikitilariaren konposizioak laukotearen soinuarekin berregiteko.