BADA!
Durangoko Azokak, Ikastolen Elkartearekin elkarlanean, ikastetxeetan lantzeko unitate didaktikoa prestatu du. 12 eta 17 urte bitarteko gazteei bideratuta egon arren, proposamenetako zenbait jarduera LH 5. eta 6. mailetako ikasleekin ere lantzeko modukoak dira, taldearen ezaugarrietara eta aurretiazko ezagutzetara egokituta. Proposamena baliatuz, ikasleek Durangoko Azoka sakonago ezagutzeko eta euskal kulturan murgiltzeko aukera izango dute. Jolasaren eta hausnarketaren bidez egingo dute, eta euren herriko edo inguruko testuingurutik abiatuko dira.
Unitate didaktikoak hiru fasetan antolatutako ibilbide malgua proposatzen du eta guztira hamar jarduera jasotzen ditu. Ez da beharrezkoa jarduera guztiak egitea: irakasleek eta ikasleek euren testuinguruaren eta interesen arabera diseinatu ahal izango dute ibilbidea, proposatutako jardueren artean hausnarketak eginez.