Mundua eder
Urdangarin, Mikel
Diskoetxea: Mikel Urdangarin
Kokapena azokan: Musikaren plaza 016
15 €
Urtea: 2024
ISBN: LG-B-18993-2024
Euskarria: CD
Deskripzioa
Mundua Eder.
Mundura sufritzeko ez ginen jaio, idatzi nuen 1997an. Horrela sinisten nuen orduan eta berdintsu sinisten dut orain. Mende berriaren laurdena ate joka dugula, mundua Europan, Afrikan, ekialde hurbilean eta haien berririk ez dakigun hamaika toki abandonatuetan odolustutzen ari den une berean, bederatzi kantudun diskoari Mundua Eder deitu diot. Ausartegia nonbait. Inozoegia akaso. Baikorra, ziur.
Ez gara atzokoak eta bizitzaren behazuna sobera dastatuta nago, haren hatzaparrak barren-barrenean sentitu ere bai. Eztitik ere izan dut dezente, laztanekin ere asmatu dut ikasten, zorionez. Baina galtzea zer den badakit; eta berriro eztiaren bila noala berriz ere galtzeko prest nago. Galtzeak ere edertasun nolabaitekoa duela ikasi dudalako.Edertasunaren bila joatea halako zerbait da. Ez da posible hura hatzematea ahaleginean minik hartzeko gertu egon gabe. Berak ere, arrosak arantza duen antzera, bere alde ilun eta zorroztua duelako, hura gabe ezin ulertu daitekeena.
Edertasuna, bere horretan eta tasun guztien gisan, kontzeptu hutsala da. Guk gizakiok ematen diogu balioa, daukan zentzu guztia. Finean edertasuna munduarekiko, inguratzen gaituenarekiko jarrera bat baino ez da; begiratzeko era bat, sentitzeko era bat, bizitzeko era bat. Musikara dedikatzea, kantuak sortzea, hunkidura bilatzea, esaterako, edertasun formak dira. Forma biziak, mugikorrak, akatsdunak, hauskorrak, hautsiak eta efimeroak…
Mundua eder ikusten dut nik, gu eta guzti. Eta kantuak egiten ditut, horren seinale. Baikortasun erradikalak bizi nau jaio nintzenetik, ahaleginean itsutu gabe alde ilun guztiak bere mende hartu dituena gaur arte. Bihar zeinek jakin. Baina gaurko burrukak ez nau kikilduko.
Txanponaren bestaldea izkutatu nahi ez duen edertasun formak ageri nahi ditu lan berri honek. Bederatzi kantu, bederatzi begirada, bederatzi ahalegin. Bizitza bera, den bezalakoa. Edo hobeto esanda, bizitza, nik ikusten dudan eran.
