15 urte zituela, Beñat Goitia gasteiztarrak Expolio taldean jo zituen Kalifornia kutsuko skate-punk doinuak. Gero, berriz, musika eta literatura uztartu zituen “Isturitzetik Etiopian barrena” ikuskizunean. Montauk taldearekin bi disko ere grabatu zituen. Bi disko horietako azkenean aldaketa sumatzen bazen ere, pandemia eta ordenagailuaren aurreko orduak izan ziren norabide berria erabat markatu zutenak. Gitarraren ordez samplerrak hartu eta 2022an BENIZZE sortu zuen Beñatek. 2023an, EHZ Festibalak, Antxeta Irratiak eta Elkarrek “Paradisu Zinema Musika Beka” antolatu zuten. Beñatena izan zen aurkeztu ziren 28 proposamenetako bat, eta irabazi egin zuen. Entzun bezain pronto, hiru epaileak proposamenaren freskura, argitasuna eta konbentzimenduaz jabetu ziren. Ñabardura askotako musika elektronikoa, oso ikusgarria eta oso esplizitua… Bekaren babesean egindako lan honen ekoizpena, "Basati", Beñatek berak hartu du bere gain, Víctor Sánchezekin batera, Elkarrek Adunan duen estudio berrian. Bekak zehazten duen bezala, BENIZZEren lan berri hau EHZ Festibalean aurkeztuko da, Aberatzen, 2024ko ekainaren 28, 29 eta 30ean.