Paulo Iztueta Armendariz idazle, pentsalari eta kultur eragileari haren seme Ibai Iztuetak egindako elkarrizketa luzea dakar Historia bizia sailaren aurtengo saioak. Aita-semeak aurrez aurre, elkarri begira: bi idazle, bi pentsalari, belaunaldien arteko transmisioa harilkatuz, memoriaren ariketari bestelako hainbat geruza eta ezpal eskainiz.

Sail honetako elkarrizketetan ohi den bezala, Paulo Iztuetaren bizitza eta ibilbide kultural eta intelektuala biltzen du elkarrizketak, Berastegiko haurtzarotik eta Tolosako eta Areatzako sakramentinoetan egindako ikastetatik abiatuta: Arnas aldizkariaren inguruko gorabeherak; Erromako Filosofia ikasketak; apaiz ordenazioa eta Ipiñaburuko parrokiako lanak; Pariserako ihesaldia, arrazoi politikoengatik; Parisko bizitza eta Soziologia eta Historia ikasketak; sekularizatzeko erabakia eta erbestetik itzulera; Zabal aldizkari eta liburu dendaren eta Elkar argitaletxearen sorrerak; UZEIko lanak hiztegigintzaren alorrean; EHUko Donostiako Pedagogia Fakultateko irakasle eta ikertzaile gisa egindako ibilbidea; Utriusque Vasconiae argitaletxearen sorrera eta ekarpena... Eta ibilbide horretan guztian zehar, kultur aldizkarien, liburuen, kultur egitasmo eta auzien inguruan bizi izandako gorabeherak eta garaiko kulturgile eta intelektualekin izandako harremanak. Eta, Ibai semeak elkarrizketaren sarreran dioen bezala, gai edo lelo nagusi batek gidatzen du Pauloren ibilbide osoa: «euskal pentsamenduaren anbizio emantzipatzaileak».

2023ko udan zendu zen Joseba Intxausti Jakinen sortzaile eta zuzendari ohiari omenaldi sentitua egin zitzaion iazko irailaren 14an bere jaioterrian bertan, Seguran, Jakinek eta Segurako Udalak antolatuta. Omenaldiko saioen artean, Intxaustiren ekarpena gogoratu zuten Paulo Agirrebaltzategik, Joseba Agirreazkuenagak eta Nekane Goikoetxeak, haren ibilbide bio-bibliografikoa, ikerketa historikoan egindako ekarpena eta euskararen historia sozialean jarritako mugarriak hizpidetzat hartuz, hurrenez hurren. Nekane Goikoetxearen azterketa dakarkigu Artikuluak sailean, Intxaustik euskararen historia sozialari egindako ekarpen erabakigarria azpimarratu eta jasotzen duena.

Zenbakia irekiz eta itxiz, Jakin filosofatzen sailean Jone M. Hernández García antropologoa elkarrizketatu du beti bezain labur eta zorrotz Itziar Ugartek, eta Egunen gurpilean sailak 2025ean zehar gurekin izango diren hiru kolaboratzaileak aurkeztu dizkigu: Shu Otero eta Cira Cresporen lankidetzari Jokin Bergara Eguren ikertzaile eta ekintzailearen sinadura berria batuko zaie.