George Alexander Dick (1837-1903) ingeniari alemaniarra izan zen (urte batzuk geroago ingelesez nazionalizatu zen). Barakaldoko Nuestra Señora del Carmen lantegian (Bizkaiko Labe Garaiak ospetsuaren aurrekoa) lan egin zuen laborategiko buru gisa 1862 eta 1866 artean. Dick, ingeniaria izateaz gain, hainbat bidaia-koaderno Alemania, Suitza, Herbehereak, Frantzia, Argentina, Kuba eta Birjina uharteetako paisaiak eta lekuak jasotzen zituzten marrazkiekin bete zituen marrazkilari afizionatua izan zen.Gauza bera egin zuen Euskal Herrira egindako lehen bidaietan (1860an eta 1861ean) eta Karmengo lantegian kontratatuta egon zen denboran (1862-1866). Horrela, Dickek 9 marrazki oparitu zizkigun Gipuzkoan (Aia, Tolosa, Pasaia, Hernani, Errenteria eta Irun) eta 20 Bizkaian, guztiak Bilboko Itsasadarraren ingurukoak (Barakaldo, Sestao, Santurtzi, Portugalete, Getxo, Abando, Begoña, Deustu eta Bilbo).Ingalaterratik ekarri ditugun marrazki argitaragabeak dira, eta horrek Euskal Herriko historiaren zati bat berreskuratzea dakar. Gainera, XIX. mendeko Euskal Herriaren ikuspegi fidagarria ematen digute, oraindik industria mundurako aldaketa prozesu batean. Gogora dezagun garai honetarako argazkigintza oraindik gutxi garatuta zegoela eta, beraz, marrazki hauek balio berezia hartzen dutela. Marrazki horiek erakusketaren katalogoan ere jaso dira.