Arima SoulBeltz kresaltsua

Disko aurkezpena

Marea bizietan Zarauzko malekoia jotzen duten olatuek bezala altxatzen da hasierako doinutik laukote soulzalearen estreinako lan luzea, fresko eta txinpartatsua, baina era berean irmoa, bere sotiltasunean. "Arima du" kantutik abiatzen da tsunamia, New Orleans hiriko zingiretan murgiltzeko: rhythm & blues dantzagarria, gospelaren espiritualtasuna eta brass-band-en metal dirdiratsuaren konpainia, 

Broken Brothers Brass Band taldeko kideen eskutik. Behin budu horretan harrapatuta, entzulea askotariko belztasunean itsatsiko da, lokatzetatik ezin atera dabilen kaimanaren antzera: "Ilunabarra" abestiaren soul dotorea, "Gu Andereak" funk aldarrikatzailea edo "Dortoka Pausoa"-k haizatzen duen mod jazz kutsua, piano jostagarriak bultzatutako latin-jazz pasarteetara iritsi arte. Ozeano koloretsu horretan orainetik sartzen ditu bandak bere erremuak. 

Hori guztia, gainera, euskaraz surfeatu du taldeak, Lidia Insaustik burututako ahaleginari esker; "Itsasoan" eta "Zerbait" soul garaikideko ale dotoreak entzutea baino ez dago Insaustiren magia antzemateko. Euskaraz egindako soul ariketa handienetakoa da Arima Soul taldearena, eta emaitza zorrotza eta ausarta da, olatu erraldoietan salto egiteko moduko balentria erakutsi baitute Lidia Insaustik (ahotsa), Mikel Makalak (baxua), Paul San Martinek (teklatuak) eta Gorka Gaztanbidek (bateria).

Abenduak 11

11:00 - 11:30

Ahotsenea Musika – Plateruena