Txalaparta, euskaldunen antzinako perkusio-tresna herrikoia da, arbasoek komunikatzeko ere erabili zutena. Gaur egun, halaber, Txalaparta euskal argitaletxe aske eta independiente baten izena ere bada. Nafarroatik, gure herriaren soberania kulturala eta informatiboa lagundu eta bermatu nahi duen egitasmoa da. Halaber, munduko herrien arteko harremana hobetuko duen edozein literatur lanen bozgorailu ere izan nahi dute, errealitatea eraldatzen, memoria historikoa berreskuratu eta gordetzen, eta aniztasunari eta utopiei bideak zabaltzen lagunduz… Euskaraz eta gazteleraz argitaratzen dute batik bat, 30-40 liburu urtean: euskal literatura, beste herrietakoa, saiakera politikoa eta historikoa, kritika soziala, ezkerraren klasikoak, historia entziklopediak… Beraien ezaugarri nabarmenena, ezbairik gabe, Txalapartak aurrera egitea ahalbidetzen duten harpidedun eta irakurleak dira. Orain, gainera, Editoriales Independientes izenarekin, elkarlanean ari dira beste herrietako argitaletxeekin.. Honela, Mexikoko ERA, Txileko LOM eta Uruguaiko Trilce argitaletxeekin batera argitalpen aniztasunaren aldeko borrokan ari dira etengabe, pentsamendu bakarrari aurre eginez. Hasieratik Alliance Internationale des Editeurs Indépendants-eko kide ere dira.

http://www.txalaparta.eus