1996ko neguan eman zion hasiera musikaz beteriko bizitzari, Gipuzkoako kostaldean, Orion. 14 urte zituela, musika, bere jolas gogokoenetakoa izatetik, bidelagun izatera igaro zen 2011n hasi baitzuen ibilbide profesionala Benito Lertxundiren taldearen parte bihurtu zenean. Urte luzez paper zati ezberdinetan bere sentimendu eta bizipenetatik sortutako letrak idazten ibili da, non amaituko zuten ere jakin gabe. 2018an, ordea, paper zatiak loratzen hasi ziren melodiekin nahastu eta kantu bihurtu zituenean. Bertan sortu zen intza. Bere errealitatetik aldentzen duen unibertso musikal paralelo bat. Unibertso hori erakustera etorri zen Ilundu Aurretik lehen EParekin, Pop doinuen eskutik, baina oraindik soinu propioa aurkitzeko bidean. 2021ean Gaztea Maketa Lehiaketan finalaurrekora iritsi zen eta urte bat beranduago Kutxa Kultur Musika programarako hautatua izan zen. Orain bere lehenengo disko luzearekin dator, soinu propioa aurkitu eta entzuleekin partekatzeko irrikaz.

https://intzaunanue.com/